Sürgündiki Sherqiy Türkistan Hökümitining Jumhur Re’isi Exmet Igemberdining Tebrik Xeti

Sürgündiki Sherqiy Türkistan hökümiti jumhur re’isi Exmet Igemberdining Rabiye Qadir xanimning türmidin boshutulup erkinlikke chiqqanlighi munasiwiti bilen yoldishi Sidiqhaji Rözigha iwertken tebrik xeti.

Köp möhtirem Sidiqhaji Rözi ependim hem sizlerning söyümlük perzentinglerge erkin dunya axbarat uchurliri zamanidiki kishilik hoquqni qoghdash chimpiyoni, Uyghur xelqining qehriman anisi Rabiye Qadir xanimning Amerika bashchiliqidiki hör dunya memliketliri, dunyadiki adalerperwer jama’etchilikining qattiq besimigha chidimighan Beijing terror hökümitining Rabiye xanimni türmidin chiqirip Amerikigha yolgha selishqa mejbur bolup ailingizlarning qaytidin xoshalliq ichide jem bolghanliqidin zor söyünüsh bilen xewer taptuq.

Shu munasiwet bilen sizni, Rabiye xanimni we perzentingizlarni shexsen öz namim bilen we sürgündiki Sherqiy Türkistan hökümiti hemde Sherqiy Türkistan xelqi namidin chin dilimdin tebrikleymen. Kelgüsidiki dunya Nobil tenchliq mukapati namzati bolghan Rabiye xanimning türmidin boshitilip hör dunyagha chiqishi Sherqiy Türkistan musteqilliq dawasidiki tarixi ehmiyetlik weqe bolup, dunya jama’etchilikining Sherqiy Türkistan xelqining insani heqqi, demokratiye, hörlük, erkinlik, musteqilliq küreshlirige berilgen ijabi ilham-bexsh bahasidur. Bu hazir dunya boylap kündin-kün’ge qanat yeyiwatqan demokratik küchlerning mustebit hökümran küchler üstidin teltöküs ghelibe qazinidighanliqining polattek delili !

Men sürgündiki Sherqiy Türkistan hökümiti namidin hör dunya döletliri, dunya jama’etchilikining komunist xitay zulmi astida yashawatqan Sherqiy Türkistan xelqining erkinlik we musteqilliq kürishini qollap, meniwi we maddiy yardem berishini soraymen.

Hörmetlik Sidiqhaji Rözi, hörmetlik Rabiye Qadir xanim, ailingizlerge saq-salametlik, tench- xatirjem we xeyirlik turmushlar tilesh bilen birge Sherqiy Türkistan xelqining hörlük, erkinlik we musteqilliq dawasidin yenimu zor muweppeqiyetlerge erishishinglarni ümid qilimen.
Ali ehtiram bilen:

Exmet Igemberdi