Qirğizistan Uygurliri <Ittipaq> Jemiyitining 5-qétimliq Qurultiyi Ötküzüldi

     Qirğizistan Uygurliri < ittipaq > jemiyitining 5-qétimliq qurultiyi 2003-yili 7- ayning 28-küni Bişkek şehridiki <Seytik > namliq ösmürler sariyining yiğin zalida tentenilik ötküzüldi. Qurultayğa wekiller, méhmanlar we rehberler bolup jemi 350 ke yéqin adem qatnaşti. Ettigen saet 10 da qurultay teyyarliq komititining reisi Yasin Haji Mehmud qurultayning başlanğanliqini élan qildi we qurultay pirizdiom ezalirini, rehberlerni hemde alhide teklip bilen qurultayğa qatnişiş üçün Almatadin kelgen méhmanlarni sehnige teklip qildi. Andin Haşir Wahidi, Néğmet Haji Bosaqow, Dilbirim Samsaqowa qatarliq şehidlirimizning rohiğa atap Qur'an tilawet qilindi. Barliq wekiller sükütte turup, wetenning musteqilliqi, Uygur xelqining azatliqi yolida hayatidin ayrilğan qehrimanlirimizğa teziye bildurdi.
Qurultay küntertiwige asasen, <ittipaq > reisi Rozimuhemmet Abdulbaqiyiw ötken 3 yilliq xizmetler heqqidi wekillerge xizmet doklati berdi. Rozimuhemmet Hajim özining dokilatida, eng éğir künlerni öz béşidin ötküziwatqan Uygur xelqi üçün bügünki künde ittipaqliqning hemmidin muhim ikenlikini, Uygur xelqi uyultaştek ittipaqlaşqandila düşmenlirimizning süyqest we hile-neyrenglirini yéngip, erkinlik we musteqilliqtin ibaret uluğwar meqsetke yetkili bolidiğanliqini alahide tekitlidi.
< Ittipaq > reisining dokilatidin kéyin, teptiş komititining reisi Tursun Islamning dokilati anglap ötildi. Qurultay qatnaşçiliri bu ikki dokilatqa bir eğizdin maqulliqini bilduruşti. Qurultayni tebiriklaş üçün kelgen Qirğizistan milletler assambiliyesining muawin reisi hemde Almatadin kelgen < Uyguristan Xeliq Partiyisi > ning reisi Qehriman Ğujamberdi, ataqliq şair, jornalisit dolqun yasinov we başqilar özlirining tebirik sözliride <ittipaq >ning üç yildin buyanqi xizmetlirige yuquri baha berdi we bundin kéyinki işlirining onguşluq boluşiğa tilekdaşliq bildürüşti.
Ahirida démukiratik awaz bériş asasida < ittipaq > ning yéngi rehberliri saylandi, yiğin reisi Rozimuhemmet Abdulbaqiyiwning < ittipaq > ning reislikige qayta saylanğanliqini élan qilğanda, barliq wekiller orunliridin turup uzunğiçe alqiş yangratti. < ittpaq > teptiş komititining reislikige Tursun islam yene bir qétim saylandi.
Qurultay ahirida Almatadin kelgen sen'etçiler bu qétimqi qurultay üçün teyyarlanğan esil sen'et numirlirini köpçilikke teqdim qildi .

Sherqiy Türkistan Information Merkizi
El Oğli Bişkek hewiri