Qeşqerde Yüzge Yéqin Uygur Yaş Qolğa Èlindi

Qeşqer wilayitining ğerbiy teripige, Qurum téğining étigige jaylaşqan Taşmiliq yézisida yéqinda yer asti partizanliq bazisi Xitay saqçiliri teripidin bayqilip qalğan. Bu yer asti bazidin giranat we bir qisim qorallar bayqalğan. Bu baza yer asti yoli arqiliq déhqanlarning öylirige tutaşturulğan iken. Xitay saqçi da’iriliri bu partizanlarning rehbirini tapalmiğan hemde bu işni bana qilip peqet Taşmiliq yézisidinla yüzge yéqin bigunah Uygurni guman bilen qolğa alğan. Tutqun qiliş herikiti hazirmu dawamlaşmaqta.
Hazir Qeşqer şehridimu weziyet nahayiti jiddiy bolup, Xitay hökümiti ilgiri türmide yétip jaza mudditi toşup qoyup bérilgen Uygurlarning hemmini qaytidin tutup türmige soliğan.
Yéqinqi 10 neççe yil mabeynide qanxor Xitay hökümiti Qeşqerde Uygurlarğa intayin éğir milliy zulum we xorluqlarni yürgüzüp, Uygur xelqige bir künmu xatirjemlik bermidi. Herküni keçte ğaljir itlarğa oxşaş herhil namdiki qanxor saçqilarni koça-koçilarğa qoyup bérip, mexsus Uygurlarning kimlikini tekşuridiğan, gepini jaylap qilalmisa yaki kimlikini yenida élip yürmigen bolsa, sehralardin kelgen bolsa héç işni sürüşte qilmastin, peqet Uygur bolğanliqi üçünla şewepsiz tutqun qilip türmige solidi we az digende 200 yuen (25$) jerimane élip qoyup berdi, puli yoq déhqan qérindaşlirimiz heçqandaq gunahi bolmiğan turuqluq neççe heptilep yaki neççe aylap türmide yetişqa mejbur boldi, keçliri bundaq sewepsiz tutqun’ğa uçriğanlar içide Uygur hakimlar, hökümet xadimliri, televiziye istansisining muhbirliri qatarliq kişilermu bar bolup, ular peqet Uygur bolğanliqi üçünla muşundaq bedel töleşke mejbur bolmaqta. Qeşqerde yéqinqi yillardin béri tajawuzçilarning ittipaqdişi bolğan qorçaq yéza kadirliri, a’ile komitetning kadirliri Xitay saqçiliriğa hemkarlişip, Uygurlarning öylirini tuyuqsiz, sewebsiz axturidiğan, er-xotunlarnimu keçiliri xatirjem uxliğili qoymaydiğan exlaqsiz, wehşiy heriketler dawam qilip keldi, yézilarğa komunist Xitay hökümitining qorçaq kadirlirini iwetti, u kadirlar nomus qilmay Uygur déhqanlarning öyliride yétip qopup, keçiliri Uygurlarning pilandin sirt bala tépişini nazaret qildi, kündüzliri bolsa étiz béşida, ériq boyida, yol boylirida Uygurlarning emgek we barliq pa’aliyetlirini nazaret astiğa aldi. Dunyada bundaq exlaqsizliq, wehşilik, çékidin aşqan zulum we xorluq Şerqiy Türkistandin başqa jaylarda bolmisa kérek. Uygurlar qanun bilen héçqandaq munasiwetsiz halda, héçbir gunah qilmiğan bolsimu Xitay hökümitining milliy zulum siyasiti, éniq qilip éytqanda Uygurlarni qirip tügitiş siyasiti, Uygurlarğa bolğan öçmenlik hessiyatliriğa tayinipla Uygurlarni haliğançe türmilerge solidi, türmilerde insan qatarida mu’amile qilinmidi, qarşiliq qilsa yaki özining gunahsiz ikenlikini saqçilarğa dise, faşist saqçilarning haqaret, tayaq we wehşi qiynaşliriğa uçridi, siyasi, milliy, diniy sewebler bilen türmige solan’ğan qérindaşlirimiz dunyada normal insanlar tesewwur qilalmaydiğan faşistik usullar bilen qiynaldi, Şerqiy Türkistan xuddi usti oçuq türmige oxşap qalğan bolup, Uygurlarning pikir qilişi, heqqaniyet üstide éğiz éçişi, yaki zulumğa qarşi inkasliri <milliy bolgunçi>, <qanunsiz diniy unsur> digen haqaretlik töhmet we qalpaqlar bilen qarilinip éğirlitip jazalandi. Piçaq songekke yetti! Uygur xelqi jan tikip küreş qilip tajawuzçi düşmenlerni qoğlap çiqirip, öz musteqilliqi we erkinlikini qolğa almiğuçe, bu zulumdin qutulğili bolmaydiğanliqini tonup yetti. Qeşqer Taşmiliq yézisidiki déhqanlarning bir amallar bilen qoral teyyarlap tajawuzçilarni wetinimizdin qoğlap çiqiriş yolida qilğan tirişçanliqliri buning delilidur. Milletçi, Uygur düşmini bolğan Xitaylar ötken yilning başliridin étibaren wetinimizde <Idilogiye sahesidiki milliy bölgünçilikke qarşi turuş> digen Uygur yoqutuş siyasi şamilini peyda qilip Uygur ziyalilirini merkez qilğan zerbe bériş, qolğa éliş, basturuş qilmişlirini élip bardi, buning’ğa qarşi Taşmiliq yézisidiki 25 yaşliq Obul Tahir ötken yili 7-ayning 18-küni<Xitay hökümiti idilogiye sahesidiki térorluq herkitini toxtatsun> dep towlap çhiqqan we derhal Xitay da’iriliri teripidin qolğa élin’ğan. Hazir türmide zulum çekmekte. Obul Tahirning qarşiliq qiliş usuli rehimsiz Xitay tajawuzçilirining mahiyitige nisbeten toğra bolmiğan bolsimu, uning qarşiliq qiliş rohi Uygurlarning rohi halitidiki Xitay zulmiğa bolğan yirginişi, öçmenliki, tajawuzçilarğa bolğan qisas oti, weten’ge milletke bolğan çongqur muhebbitining Obul Tahir wujudidiki inkasidin ibarettur.

Şerqiy Türkistan Information Merkizi