"Şerqiy Türkistan Informatsiyon Merkizi"
 2002 – Yilliq Xizmetlirini Xulasilidi

Yéngi yil harpisida, < Şerqiy Türkistan Informatsiyon Merkizi > ning Reyisi Abdujélil Qaraqaş, muawin reyisliridin Perhat Muhemmidi we Dilxat Rexitler Germaniyede jem bolup, merkezning 2002 – yilliq xizmetlirini hulasilaş bilen birge, yéngi yilliq xizmet purogrammisini we buningdin kéyin Xitay hakimiyitige qarşi yolğa qoyudiğan stiratigiyesini tüzüp çiqti.

Merkez rehberliri, 2002 – yilida gerçe Xitay hakimiyitining < 11 – sintebir > weqesini bahane qilip, weten içi we sirtida élip bériliwatqan milliy musteqilliq herikitimizge qaratqan siyasi hujumlirini we töhmetliri alahide küçeygen, Şerqiy Türkistan xelqiğe qaratqan siyasi bésim we zulmini pewquladde éğirlaşturğan bolsimu, emma bu bir yil içide Şerqiy Türkistan mesilisini xelqaralaşturuş jehette zor qedem taşlanğanliqini birdek halda mueyyenleştürdi.

Merkez rehberliri yene, Birleşken Döletler Teşkilatining 2002 – yili 9 – ayda < Şerqiy Türkistan Islamiy Herikiti > ni < xelqaraliq teroristik teşkilatlar > tizimlikige kirgüzüş heqqide alğan qarariğa Qet’i narazi ikenlikini we bu qararni esla etirap qilmaydiğanliqlirini, şundaqla pat yeqinda Amerika hökümitige we birleşken döletler teşkilatiğa < Şerqiy Türkistan Islamiy Herikiti > heqqide alğan qararini qaytidin közdin keçürüp çiqiş heqqide resmiy iltimas we murajetname sunuş bilen birge, xelqaraliq insan heqliri teşkilatlirining we ammiwiy guruppilarning, şundaqla dunya metbuatlirining bu jehettiki qollişini qolğa keltürüş üçün jiddi tirişçanliq körsütidiğanliqlirini oçuqçe ipade qilişti we bu heqte birdek pikirge kélişti.
Merkez rehberliri, Şerqiy Türkistan mesilisining xelq‘aralişişqa qarap yüzlünişige egişip, dunyadiki bezi küçlerning Şerqiy Türkistan dawasini özlirining stiratigiyélik menpeetliri üçün Xitayğa qarşi qollunidiğan kozurğa aylanduruwéliş we milliy herikitimizning asasiy tizginini qoliğa éliwéliş hewipining küçüyüşke başliğanliqiğa bolğan endişilirini ipade qilişti we bu jehette körülgen ğélite alametlerdin xelqimizni waqtida hewerlendürüp turuşning zörürlikini tekitleşti.

Merkezning reyisi Abdujélil Qaraqaşning xizmet doklatida, ötken bir yilda ijabiy netijilerning qolğa keltürülgenliki, Xelqara Keçürüm Teşkilatining ötken yili 2 – ayda Şerqiy Türkistan heqqide élan qilğan doklatida, informatsiyon merkizi teripidin teminlengen we élan qilinğan ahbarat – uçurlarning mohim menbe süpitide yer alğanliqi, ötken yildin buyan merkez teripidin we bayanatçisi Dilxat Rexitning Uygurlar duç kéliwatqan aktiwal jiddi mesililer we milliy herikitimiz heqqide dunyağa 50 qétimdin artuq ahbarat we bayanat élan qilğanliqi, bu bayanatlarning özwaqtida BBC .... qatarliq dunya metbuatlirida élan qilinğanliqi, merkezning orunlaşturuşiğa asasen bayanatçimiz Dilxat Rexitning Gollandiye, Firansiye, Singapor ... qatarliq ellerde ötküzülgen xelqaraliq muhakime yiğinlirida Uygurlar mesilisi heqqide mehsus doklat bergenliki, bundin başqa yene ötken yilliq ramizan eyi mezgilide merkezning Uygurlar mesilisi heqqide germaniyening herqaysi rayonliridiki Türk – Islam teşkilatlirida 10 qétimdin artuq doklat bérip, Şerqiy Türkistan mosulmanlirining derdini anglatqanliqi emiliy misallar arqiliq tepsili bayan qilindi.

Abdujélil Ependi doklatida yene, Yaponiyedin merkezning internet sehipisige kirgüçilerning sanining köpüyiwatqanliqini nezerde tutup, ötken yili 10 – aydin başlap internet sehipiside mehsus Yaponçe sehipe tesis qilğanliqini, Türk xelqiğe qaritilğan teşwiqatni küçeytiş üçün, ilgiri iqtisadi sewepler tüpeylidin birmehel tohtap qalğan < Uçqun > gézitining Türkçe nusqisi „Kivilcim“ ni ötken yili qaytidin eslige keltürgenlikini, Türkiyediki ilmiy tetqiqat orunliriningmu informatsiyon merkizining weten heqqide bergen hewer – uçurliridin qimmetlik menbe süpitide paydiliniwatqanliqini, bolupmu ötken yili 2 – ayda Türkiyediki bir tetqiqat merkizi teripidin élan qilinğan we Türkiyede küçlük tesir qozğiğan < Kommunist Xitayning Zulum Siyasiti we Şerqiy Türkistan > namliq çong hejimlik ilmiy tetqiqat esiride, informatsiyon merkizining menbe’elirining xéli éğir salmaqni igelligenlikini, niformatsiyon merkizining ötken yili yene Xitay tilidiki teşwiqatqa alahide ehmiyet bergenlikini, ilgiri merkezning Xitayçe sehipiside peqetla çetellerdiki Xitay metbuatliri teripidin élan qilinğan hewer – maqalilar yer alğan bolsa, ötken yilidin başlap merkezning weten heqqidiki hewer – uçurlirining biwaste Xitay tilida bériliwatqanliqini we bu sehipidin Xitay metbuatlirining muwapiq derijide paydiliniwatqanliqini bayan qildi.

Abdujélil Qaraqaş ependi doklatida yene, ötken yili merkezning weten içi bilen bolğan alaqini küçeytişke alahide ehmiyet bergenlikini we bu bir yil içide Xitay hökümiti teripidin içki qisimda tarqitilğan 200 parçidin artuq qiziltaşliq höjjet – matiriyalining qolğa çüşürülgenlikini ... informatsiyon merkizining pa'aliyetlirining weten içidiki xelqimizning we türlük qarşiliq körsütüş teşkilatlirining teqdirige, qollişiğa we alahide işençisige erişkenlikini tekitlep ötti we buningğa örnek süpitide, ötken yili weten içide qurulğan < Uygur Démokratik Partiyesi > ning Şerqiy Türkistan informatsiyon merkizini özlirining çetellerdiki toluq hoqoqluq wakaletçisi dep elan qilğanliqini tilğa élip ötti.

Abdujélil ependi doklatining ahirida, informatsiyon merkizining ötken yili xizmet ehtiyaji tüpeylidin merkézni Germaniyening Münçen şehridin başqa şeherge yötkigenlikini eskertti.

Merkezning 2002 – yilliq xizmetlirini xulasilaş yiğining axirda reyis Abdujélil Qaraqaş, muawin reyisliridin Perhat Muhemmidi we Dilxat Rexitlerning birdek maqullişi bilen merkezning 2003 - yilliq xizmet pilani közdin keçürlüp maqullandi.
Merkezning 2003 - yilliq xizmet pilaning nişani asasi jehettin ana wetenge qartildi.