1999 -yili 21 - Fevral Meşhur Demukratikzat, " Çet'el Hitay Demokratik Herkiti Aleqelişiş Cemiyiti "ning reisi Wei Jing Shing, German tiliğa tercime qilinip neşir qilinğan " Égilmes Adem " namliq esirini Germaniye helqige tonutuş meqside Germaniyening München şehrige ziyaretke kelgen idi. 22 - Fevral Wei Jing Shing efendi " Dunya Uygur Ahbarat Tori " ning muhbiri Ferhat Muhammedining mehsus ziyaritini qobul qildi hemde ziyaret ceryanida, Şerqiy Türkistanning növettiki siyasi veziyiti heqqidiki bezi qaraşlirini otturğa qoyup ötti.

Wei Jing Shing efendi Hitay demokratik herkitining Şerqiy Türkistanğa bolğan tesiri heqqide tohtulup mundaq dédi: " Şerqiy Türkistanda Hitay demokratik herkiti nahayiti küçlük teşkili aparatqa ve qoşunğa ige. Epsuski, azsanliq milletler rayunlirida kommunist Hitay hakimiyitige qarşi demokratik herketler ikki hilğa bölüngen, uning biri şu rayunlardiki yerlik helqning öz teqdirini özi belgüleş hoqoquni qolğa keltürüş üçün élip berivatqan milli küreşler. Yene biri, şu azsanliq milletler rayonlirida yaşavatqan Hitay helqining özlirining demokratik erkinlikini ve hoqoqini qolğa keltürüşini mehset qilğan halda élip bérivatqan küreşliridin ibaret. Emma, kommunist Hitayning eksiyetçil teşviqati tüpeylidin, şu rayonlardiki yerlik millet bilen Henzular ottursida izçil türde zidiyet ve sürkülüş davam qilip keldi. Şunga méningçe bu ikkihil küreş ottursida nahayiti çong perq bar. Şunga biz ular ottursidiki buhil zidyet ve sürkilişlerni yoq qilişqa tirşivatimiz ve Şerqiy Türkistandiki Hitay demokratik küçliri bilen yerliklerdin teşkilengen milli küçlerni birleştürüşke ve maslişip herket qilişni qolğa keltürüşke tirşivatimiz. Méningçe Şerqiy Türkistan, Tibet ve Içki Mungğulistandiki kommunist Hitayğa qarşi milli küçler bilen şu rayonlardiki Hitay demokratik küçliri birlişip herket qilsa, kommunist Hitay hakimiyitini téhimu téz ağdurup taşliğili bolidu. Eger kommunist Hitay hakimiyiti ağdurulup, uning ornini demokratik tüzüm igellise, u çağda pütün milletlerning arzusi ve heq - hoqoqi toluq işqa aşidu ".

Wei Jing Shing efendi yéqinqi yillardin buyan Şerqiy Türkistanda kündin - künge küçiyivatqan Hitay hakimiyitige qarşi quralliq milli küreşlerge baha bérip mundaq dédi: " Şerqiy Türkistanda yüzbérivatqan kommunist Hitay hakimiyitige qarşi quralliq küreşler méningçe normal bir küreş, bu hil qoralliq küreşler Şerqiy Türkistandila emes, belki Hitayning herqaysi ölkiliridimu élip berilivatidu, elbette men herqaysi milletlerning buhil küreşlerni hemkarliq içide ortaq élip berişini umid qilimen. Men şuningğa işinimenki, Hitay içi ve sirtidiki mutleq köpsandiki helq ve Hitay demokratik küçliri Şerqiy Türkistan helqining öz teqdirini özi belgileş hoquqini qolğa keltürüş üçün novette ciddi élip berivatqan herhil şekildiki milli herketlirini qollap - quvetleydu ve Şerqiy Türkistan helqige hisdaşliq qilidu ".

Ahirida Wei Jing Shing efendim Hitay demokratiyege koçkendin keyinki Şerqiy Türkistan helqining teqdiri heqqide tohtulup mundaq dedi: " Barçe Milletlerning öz teqdirini özi belgüleş hoquqi, ularning eng asasliq hoquqliridin biri. Eger Hitayda demokrassiye işqaassa, peqet Şerqiy Türkistan helqila emes, Hitaydiki başqa milletlermu tamamen öz teqdirini özi belguleş hoquqiğa ige bolidu. Bu, Hitay demokratik herkitining asasliq pirinsiplirining biri ".

Wei Jing Shing efendi söhbet ahirida, çeteldiki Hitay demokratik küçlirining çetelllerde paaliyet qilivatqan Şerqiy Türkistan teşkilatliri bilen hemkarlişip paaliyet élip beriş ve ortaq duşmenge ortaq qarşi turuşning yolliri heqqide ciddi izdinivatqalliqini ve tirişçanliq körsitivatqanliqini bayan qildi.

Muhbirimizning Wei Jing Shing efendi bilen ötküzgen bu qétimqi unalğuluq söhbitining emeli ehvali " Germaniye Avazi " Radioistansining Hitayçe anglitişida eynen hever qilindi.