"Sherqiy Türkistan Informatsiyon Merkiz"ning 1-ayning 9-küni wetendin biwaste alghan ahbaratigha asaslanghanda, yéqinda Qaraqash nahiyisining Qarasay yezisida olturushluq 14 neper yash talip, Hitay hökümitining bilip qélip jazalishidin qorqup, yezidin 18 km yiraqliqtiki adimizatsiz qumluqqa piyade bérip, bu yerde diniy ibadet we söhbet élip bériwatqanda, hökümetning shu yézigha orunlashturup qoyghan bir paylaqçisi buningdin hewer tépip, derhal shu etraptiki qoralliq saqçi qisimlirigha melum qilghan, netijide 7 neper qoralliq saqçi qumluqqa basturup kirip héliqi 14 neper talipni ibadet qilip olturghan yéridila tutiwalghan we ularni aldigha sélip yalap élip mangghan. Qumluqta kitiwatqanda qoralliq saqçilarning özlirige tutqan qopal muamilisidin qattiq ghezeplengen 14 neper talip, özlirini élip kétiwatqan 7 neper saqçigha tuyuqsiz hujum qilip, ularni tayaq-toqmaq bilen urup yéqitip, hemmisining qorallirini tartiwalghan, bu jeryanda 2 neper saqçi qeçip ketken. Taliplar qalghan 5 neper saqçini baghlap, aldigha sélip heydep, qumluqning içki qismigha qarap qeçip ketken. Bu weqedin hewer tapqan yéqin etraptiki saqçi qisimliri, mehsus nefit etretliri ishlitidighan qumluq mashiniliridin paydilinip, taliplarning arqisidin qoghlighan bolsimu, emma ularni tutulmighan we qaytip kélip ehwalni Hotendiki Qoralliq Saqçi Qisimliri qomandanliq shitabigha melum qilghan, qomandanliq shitabi "Jenubiy Shinjiang Herbiy Rayoni" ajritip bergen ikki tik uçar ayrupilan arqiliq qumluqta omumiy tekshürüsh élip barghan we tekshürüsh jeryanida qumluqning içki qismida qiçip kétiwatqan taliplarni körüp qélip, tik uçar ayrupilangha orunlashturulghan pilumuttin ulargha qaritip oq yaghdurushqa bashlighan, gerçe taliplar qarshiliq körsütüshke tirishqan bolsimu, emma ular héliqi saqçilardin olja alghan qorallarni ishlitishni bilmigeçke, amalsiz qalghan, netijide 8 talip we ular yalap élip mangghan saqçilarning 2 nepiri neq meydanda oq tegip ölgen, qalghan 6 talip we 3 neper esir saqçighimu oq tegip eghir yarilanghan. Saqçi dairliri 6 neper yaridar talipni tutup apirip soraq qilghanda, ular,"siler bizni diniy télim élishqa yol qoymighaçqa, qumluqqa kirip diniy télim alghan iduq, bashqa gunahimiz yoq!" dep jawap bérishken.

Hewerlerge qarighanda, yaridar taliplarning 3 nepiri soraq jeryanida ölüp ketken, qalghan 3 nepiri hazir jiddiy qutquzushta iken.

Undin bashqa yene, muhbirimiz Uçqunning hewirige asaslanghanda, bu yilqi roziheyt harpisida,"Aptonum Rayonluq Partikom"ning Hotenge iwetken "hizmet guruppisi"ning bashliqi Ismayil Téliwaldi hizmet guruppisi namida mehsus uqturush tarqitip, Hoten rayonida bölüm derijiliktin yuquri milliy kadirlarning heyt namizigha qatnishishini çekligen we bu uqturushning rohigha hilapliq qilghuçilarni memuri jehettin qattiq bir terep qilidighanliqi heqqide agahlandurghan. Shuning bilen birge heyt harpisida Hoten téliwiziye istansisining yighin zalida Hotendiki nahiye derijiliktin yuquri milliy kadirlargha,"Hotende milliy bölghünçilikke qarshi köresh" digen temida hazirlanghan bir içki höjjetlik film körsitilgen bolup, mezkur filmde melum bir öyde qorshaw astida qélip, ikki qolini kötürüp çiqqan 4 neper Uygur yashning neq meydanda oqqa tutulup etip öltürülgenliki heqqidiki bir körünüsh yer alghan.

Muhbirimiz Uçqunning hewirige asaslanghanda yene, yéqinda bir top saqçi Qaraqash nahiyisining Jahanbagh yezisigha bir "gumanliq" kishini tutqili barghanda, bu yezidiki kishiler saqçilarni oriwilip, ularning adem tutushigha qarshi çiqqan, netijide bu saqçilar "gumanliq" kishini tutush uyaqta tursun, janlirini aran teste qutquzup yezidin qeçip çiqqan. Hotendiki saqçi dairliri bu weqeni bahane qilip, köpligen jandarma we saqçilarni ishqa sélip Qaraqash nahiyisige kirip-çiqidighan éghizlarni qamal qilip, ötken-keçkenlerni qattiq tekshüridighan boliwalghan.