"Sherqiy Türkistan Informatsiyon Merkizi" hewiri : Hotende bir qançe aydin buyan 100 mingdin artuq esker, jandarma, saqçi we "helq eskerliri"ni seperwer qilipmu yene mujahit Shireli we uning sepdashlirini qolgha çüshürelmigen Hitay dairliri, mujahitlargha qarita arqa-arqidin ikki qétim "teslimname" çiqirishqa mejbur boldi. Hitayçe "Hoten geziti"ning 9-ayning 14-künidiki sanida hewer qilishiçe, Hoten wilayetlik jamaet hewipsizlik idarisi 9-ayning 12-küni tunji qétim "teslimname" élan qilp, Shireli bashçiliqidiki mujahitlar guruppisini 15 kün içide teslim bolushqa ündigen we bu muddet içide teslim bolsa ulargha alahide "étiwar" béridighanliqini tekitligen idi, emma özining barliqini kommunist Hitay hakimiyitige qarshi köreshke atiwetken Shireli we uning sepdashliri Hitayning "teslimname"sige pisent qilmay, eksiçe qarshiliq körsütüsh heriketlirini yenimu küçeytken. Buningdin qattiq ghezeplengen Hitay hökümiti, her biri 120 neper jandarmidin terkip tapqan 12 mehsus qoghlap tutush guruppisi teshkillep, Hoten rayonining barliq yeza, kent we mehellilerde, shundaqla etraptiki janggalliqlarda omumi yüzlük ahturush herikiti élip barghan bolsimu, emma ular Shireli we uning sepdashlirining sayisinimu tapalmighan. Shuning bilen Hitay hökümiti yene 2-qétim "teslimname" çiqirishqa mejbur bolghan. Hitayçe "Hoten geziti"ning 12-ayning 23-künidiki sanida, Hoten wilayitining walisi Jüret Memtiminning, "jiddiy seperwerlikke kélip, Shirelini we Köresh zorawan teroristlar guruhining qalduqlirini yoqutush mehsus körishini çongqur qanat yaydurayli" digen mawzudiki bir parçe bayanati elan qilindi, mezkur bayanatta, mujahit Shireli we uning sepdashliri teslim bolushqa çaqirilghan bolup, ulargha 12-ayning 30-künigiçe möhlet bergen. Uningdin bashqa yene mezkur bayanatta, Shireli we uning sepdashlirini pash qilghuçilar we tutup bergüçilerge alahide "mukapat" béridighanliqi eskertilgen. Buningdin biz kommunist Hitay hakimiyitining neqeder biçare we çerisiz halgha çüshüp qalghanliqini körüwalalaymiz. Wali Jüret Memtimin mezkur bayanatida, Hotenning nöwettiki weziyitining intayin jiddiy we heterlik basquçqa bérip yetkenlikini etirap qilishqa mejbur bolghan we bu heqte tohtilip mundaq digen:"nöwette Hoten wilayitide milliy bölgünçilerge qarshi köresh weziyiti intayin keskinleshti, bolupmu zorawan teroristlar guruppisining kattibeshi Sheréli tehishe qeçip yürmekte, Köresh zorawan teroristlar guruhining qalduq qisimliri tehi toluq yoqutilghini yoq". Yuqarqi bayanatta, yene mujahit Shireli heqqide tohtulup eynen mundaq diyilgen: "Shirelining heqiqi ismi Ghoja Memet Abbas bolup, bu yil 28 yashta, u Guma nahiye Muji yezisi Say kentidin bolup, zorawan teroristlar guruppisining kattibeshidin ibaret. U, 1997-yilidin etibaren milliy bölgünçilik paaliyetlirini teshkilligen we uninggha qatnashqan bolup, öltürüsh qatarliq teroristik heriketler we dölitimizning biheterlikige hewip yetküzidighan paaliyetler bilen shughullanghan, shundaqla u yene "5-fewral" Ghulja weqesini pilanlighuçi we teskilligüçilerning biri bolup, dölet biheterlik ministirliki teripidin tutush buyruqi çüshürülgen qaçqun jinayetçidin ibaret". Yuqarqi bayanlardin biz, nöwette Sherqiy Türkistan miqyasida yüz bériwatqan Hitaygha qarshi heriketlerning tasadipiy otturigha çiqqan yekke haraktirliq heriket bolmastin, belki çongqur ammiwi asasqa ige uzun muddetlik heriket ikenlikini çüshünüp yeteleymiz. Hörmetlik wetendashlar, sizlerge melum bolsa kerek, 99-yili 7-aydin buyan Hotende Köresh, Shireli rehberlikidiki milliy mujahitlar guruppisi kommunist Hitay hakimiyitige qarshi partizanliq urushi bashlap, Hotenning her qaysi jaylirida yoshurunup yürüp, Hitayning saqçi we eskerlirige qahshatquç zerbe bérip kelgen idi. ularning bu herikiti Sherqiy Türkistanning omumi siyasiy weziyitige tesir körsütüp, Hitay hökümitining yuquri derijilik rehberlik qatlimidikilerni qattiq endishige saldi. Hitay hökümiti Hotende bash kötürüp çiqqan milliy musteqilliq heriketlirini derhal basturush üçün, 99-yili 8-ayning 22-künidin étibaren Hitay qoralliq saçi qisimliri qomandanliq bashshitabigha qarashliq 8660 qisimni, " Shinjing Qoralliq Saqçi Qisimliri Bash Etriti"ge qarashliq 8 – tarmaq etretni we "Hitay Helq Azatliq Armiyesi"ning 36 ming 224 – qisimni arqa-arqidin Hoten rayonigha yötkep kilip ularni Hoten herbi shöbe rayonining bashqurishigha ötküzüp berdi, bu eskerlerning Hotenge orunlashqanliqi heqqidiki hewerler "Hoten geziti"ning 8 – ayning 24 – künidiki we 12 – ayning 23 – künidiki sanliridimu hewer qilindi. Undin bashqa Hitay hökümiti yene, "Ishlepçiqirish Qurulush Bingtueni" ning Hotende turushluq 47- Tueni qarmiqidiki "Helq Eskerliri" ni we Hotenning herqaysiy nahiyéliridiki Hitay Puqraliridin teshkillengen "Helq Eskerliri" ni seperwerlikke keltürdi, shuning bilen Hoten rayonida Köresh we Shireli bashçiliqidiki milliy mujahidlar guruppisini yoqutushqa seperwer qilinghan esker, saqçi we "helq eskerliri" ning omumiy sani tehminen yüzminggha yéqinlashti. Gerçe Hitay hökümiti heddi-hesapsiz herbiy küçlirini seperwer qilip, Shireli bashçiliqidiki milliy mujahid küçlirini qolgha çüshürüshke tirishqan bolsimu, emme yene bir jehettin özining teshwiqatlirida bu mujahidlarning sanini intayin az qilip körsitishke tirishti. Mesilen atalmish Aptonom Rayonluq Partkomning daimiy ezasiy Ismayil Tiliwaldining bu yil 8-ayning 27-küni Hoten shehridiki besh derijilik kadirlar yighinida qilghan sözide Küresh we Shireli bashçiliqidiki partizanlar guruppisining Ürümçi, Turpan, Ili, Aqsu, Qeshqer, Hoten qatarliq jaylarda mehsus shöbilirining barliqi we shöbilerning pash qilinghanliqi, Shirelining bolsa Hoten shöbisining mesuli ikenligi, Shirelining bashqurushida 200 din artuq mujahidning barliqi, bularning 130 din köqrekining qolga çüshüsh, peqet 50 ademning qeçip yürgenliki bayan qilingan idi. Emma aridin 4 aydin köprek waqit ütüp, bügünki künde Hoten walisi Jüret Memtiminning Hotende "milliy bölgünçilikke qarshi küresh"ning intayin jiddiliship ketkenligidin söz eçishi, nöwette Hoten rayonida Hitay hakimiyitige qarshi paaliyet élip bériwatqan yerlik küçlerning Hitayning teshwiqatlirida bayan qilinghinidek unçiwala ajiz we küçsiz emesligini körsütüp bermekte. Yene bir jehettin Hitay hökümitining shunçiwala köp herbi küç seperwer qilipmu yene tehi hazirgha qeder Shireli bashçiliqidiki milliy mujahidlar guruppisini qolgha çüshürelmigenliki, nöwette Hoten rayonida Kommunist Hitay hakimiyitige qarshi herketlerning intayin çongqur ammiwiy asasqa ige ikenlikini roshen halda körsütüp bermekte. |