SALAM TÜRKIYE !

(Şerqiy Türkistanliq bir muhbir hanimning yürek sözi )

ATILLA

Salam Türki milletlirining pehri şanu-şewkiti, qoyni illiq quçiği keng zimin. Qoynungğa mustafa kamal qewrilirini ziyaret qilğili, sendiki alemşumul qehrimanliq dastanlirini ügengili, sendiki millet söyer rohtin örnek alğili, tarihimni qazğili, izlirimni izligili, hesretlik dert –piğanlirimni sanga tökkili, puçulanğan yürügümge melhem izligili keldim.
Angla Türkiye! dertlirimni sanga iytmay, hesretlik köz yaşlirimni sanga tökmey kimge tökey? çünki dunyada Uygurning sendinmu artuq iç köyer qirindişi barmu?
Dunya medinyet ğezinisining açquçi kömülgen, hayatliq başlanğan nuhta dep qarilip dunya köz tikiwatqan, nifit altunlarğa kömülüp yatqan ajayip bay bir ziminning heqdar igisi turuqluq Xitay zulumliri, alwang yasaqliri, nadanliqta qalduruş siyasetliri tüpeylidin, ottura esr jahalitide aç zarliqta ingrawatqan janlardin, bir kün keçkiçe itizliqta mükçiyip işlisimu, kommunstik partiyening tügümes alwang yasaqliri tüpeylidin çapini tizidin aşmay çirayliri qorulup ketken emma aq köngüllükte tengdaşsiz déhqanlirimdin, Zhunggoğa işçilar sinipi rehberlik qilidu deydiğan aldamçi siyaset astida, karxane fabrikiliri parixor çirik kommunst emeldarlar teripidin bulang talan qiliniwatqan işçilardin, qolida tömürning sunuqi yoq turuqluq térorist digen töhmet bilen türmilerge taşliniwatqan, qetli qiliniwatqan ot yürek Uygur yigitliridin, qosaqtiki baliliri zorluq bilen élip taşliniwatqan anilardin, qelem erkinligige zar bolup yürüği siqiliwatqan Uygur ziyaliliridin,Xitay kommunstik partiyesining Islam dinini we Türk Uygur tilini yoq qilip, Uygur Türüklirini millet süpitide yoqutuwitiş siyasiti yürgüzüşi netijiside Xitay tilidiki mekteplerge kirişke mejbur boluwatqan qara köz balilardin, qisqisi Türki milletlirining anayurti bolğan Şerqiy Türkistandiki 25 milyun Uygur Türükliridin sanga yalqunluq salam !.
Angla Türkiye! şu tapta men köz çanaqqlirim liq yaş, qattiq hayajanlanmaqtimen. Bu wetini turup wetensiz qalğan, mustemlikiçilikning derdini hağiçe tartqan bir mezlumening öz qirindişini tapqandin kiyinki hayajanlinişi bolsa kirek. Hoşalliğimdin Istanbul şehridiki eng igiz çoqqilarning birige çiqip, awazimning bariçe towluğum erkinlik hörlükning peyzini sürgüm kilidu. Çünki men Xitayda awazimnimu tüzükrek çiqiralmay nepsi boğulğan biçarimen.
2003 - yili mart ayliri men olturğan ayrupilan güzel Istanbul şehrige kilip qondi. Men hayajan ilkide bu hör dunyadin erkin nepes aldim. Burnumğa démukratiyening puriqi güppide urulğandek rahetlik bir sizim wujudumni çulğiwaldi.
Allah!!!!!qirindaş bilen qirindaş didar körüşmigen bolsimu, yürigi bir – birini tonuydiken emesmu? xuddi Uygurningkidek qametlik bestige saqçi formisi xoymu yaraşqan Türük saqçilirining merhaba xanim digen tebessumliridin söyündüm. Bu hayatimda saqçilarning illiq muamilisige tunji irşişim. Çünki Xitay saqqçiliri saqçi maşinlirini tola çiqirtip, mehellilirimizdiki aka-hedilirimizni, qirindaş uruq tuqqanlirimizni, térors digen böhtan bilen tutup, etisi ölügini taşlap bérip yürügümizni mujuwetken emesmu?. Xanim sizning wizingiz iqamet wizisi iken. Bir ay içide emniyet mudirligige birip, resmiyet bijirip ikki balingiz bilen Türkiyede qançilik tursingiz turung, Şerqi Türkistanliq qirindişimiz üçün wetinimiz derwazisi kengri oçuq didi. Bu minutlar hayatimdiki eng untulğusiz söyünüş minutliri bolup qaldi.
Angla Türkiye! Xitayning eng qorqidiğini nime? Uygurning öz tarihini özining Türk ikenligini bilip qilişidur. Şunga Xitay kommunstliri herqaysi tarihi dewirlerde tariihimizni oxşimiğan derijide burmilap turdi.
Angla Türkiye! Xitayda ötken onneççe baharim, eşu ikki qoli qanğa boyalğan kommunstik partiyeni medhiyeleş bilen ötti. Déhqanning hosul alalmay namratlişip ketkinini öz közüm bilen körüp turuwatsammu, yüreklirim bu naheqçiliqqa çidimay örtünüp turiwatsimu, déhqan bay boldi dep hewer yazdim. Xelqimning kommunstik partiyedin jaq toyğanliğini bilip tursammu, Xelq kommunstik partiyeni söyidu dep yazdim. Xitayning parihor, xiyanetçi emeldarlirini öz közüm bilen körüp tursammu, kommunstik partiye pak dep xewer yazdim.
Çünki Şerqiy Türkistan puhralirining heqni sözligen küni hayatini ahirlaşturğan küni bolup qalatti.
Men hayatimda mana muşundaq qul muhbir, kommunstik partiyening medhiyeçisi bolup ölüp ketsem bu hayat neqeder içinişliq hayat bolidu-he? bular üstide pikir yürgüzgen minutlirimda huddi bedenlirim tikkenlişip ketkendek hés qilattim.
Angla Türkiye! sende heqiqi ademdek yaşiğili, erkin qelem tewretkili, erkin towliğili, hayatim menasini sürgili keldim. Istanbul boğizidiki sayahet parahotlirida olturup, hör déngizning musteqil hojayinliri bolğan biliq alğuçlar bilen piçirlaştim. Hey biliq alğuç sen ne qeder hör we behtlik he! Gah asmanda perwaz qilsang, gah su aastiğa şungğuysen, xalisang su yüzide olturup bipayan déngizni tamaşa qilisen ...........
Munglirimni angla Türkiye dunyada tang atmaydiğan kéçe yoq. Uygur üçün bu kéçe gerçe tolimu uzunğa sozulğan qarangğu kéçe bolğan bolsimu, lékin dunya qanunyiti boyiçe haman tang atidu. Uygur Türükliri haman bir küni musteqilliq marşini yangritidu. Buning eksiçe sotsiyalizim we kommunstik partiye digenler alliqaçan tarihi tereqqiyat muqerrerligining qattiq şallişiğa duç kilip asta-asta dunya sehnisidin çüşüp qalmaqta. Zhunggodiki kommunstik partiye digenler ene şu patqan quyaşning şolisi xalas.........
Angla Türkiye! wetinimdiki 25milyon Uygur Türki 1.5 milyart Xitayni qorqitiwatidu buning sewebi tomurimizda éqiwatqan qanning Türük qini bolğanliği üçündur. Uygur qirindişingdin pehirlen Türkiye..........

2003 – yili 31-Mart ISTANBUL.