Şerqiy Türkistan Information Merkizi Jiddi Yiğin Çaqirdi

Merkizi orgini Germaniyening Muenchen şehridiki < Şerqiy Türkistan informatsiyon merkizi > muşu ayning 16 - küni merkez işhanisida jiddi yiğin çaqirip, informatsiyon merkizining içki qurulmisini omomiy yüzlük tertipke séliş bilen birge, Hitay hakimiyitining nöwette yolğa qoyuwatqan Uygurlarning milliy kimlikini tüptin yoqutuş stiratigiyisini dunya jamaetçilikige öz waqtida anglitişning yéngi pilan - purogrammilirini muzakire qildi we informatsiyon merkizini yéqin kileçekte kespi ahbarat ( mehpi ahbarat ) orginiğa aylanduruş heqqide mohim qarar aldi.
Informatsiyon merkizining reyisi Abdujelil Qaraqaşning riyasetçilikide çaqirilğan mezkur yiğinğa, merkezning muawin reyisliridin Perhat Muhemmidi, Dilşat Reşitler biwaste, herqaysi ellerdiki wakaletçiliri we mehpi alaqiçiliridin bolup 50 ke yéqin kişi wastiliq qatnaşti.
Buqétimqi yiğinda, kommunist Hitay hakimiyitining 1996 - yili < 7 - nomurluq höjjet > digen namda Şerqiy Türkistanğa qarita yolğa qoyğan yéngi basturuş stiratigiyisidin buyan, Uygur helqining diniy, milliy kimlikini tüptin yoqutuş üçün ijra qiliwatqan qedem başquçliq siyasetliri etirapliq analiz qilindi we Hitay hakimiyitining bu jiddi atsimilatsiye siyasitini dunya jamaetçilikige téhimu tesirlik we janliq şekilde anglitiş we dunya jamaetçilikining Hitay hakimiyitige qarşi inkasini qozğaşning çare - tedbirliri muzakire qilindi.
Yiğinda yene, informatsiyon merkizining aşkare we mehpi hadimlirini peydin - pey kesipleştürüş, informatsiyon merkizining helqimizğe qaratqan içki teşwiqatini küçeytiş, < Şerqiy Türkistan ( Uyguristan Milliy Qurultiyi > we < Dunya Uygur Yaşliri Qurultiyi > ... qatarliq qerindaş teşkilatlar we Şerqiy Türkistandiki herqaysi milliy küçler we guruppilar bilen bolğan diyalog we hemkarliqni yenimu ziçlaşturuş, çetellerde mehpi heriket élip bériwatqan Hitay jasoslirining tegi - tektini qisqa waqit içide omomiy yüzlük tekşürüp éniqlap çiqiş, herqaysi dölet, türlük helq'araliq teşkilatlar, ammiwiy guruppilar, hewer agentliqliri we iqtisadiy guruppilar bilen keng dairide uçruşuş we alaqini yolğa qoyuş ... qatarliq mesililer heqqide mohim qararlar élindi.
Yiğinda yene merkezning yéngi hizmet pilani we tetqiqat temiliri tüzüp çiqilip, merkezge tewe hadimlarning kespiy alahidilikige asasen konkiritni iş teqsimati élip berildi.
Informatsiyon merkizining reyisi Abdujelil Qaraqaş bu qétimqi yiğinda qilğan sözide, nöwette Şerqiy Türkistanning siyasiy weziyitining intayin heterlik basquçta turiwatqanliqini, Hitay hökümitining siyasiy neyrengliri tüpeylidin Uygurlarning din, maarip, mediniyet ... qatarliq türkük sahelirining éğir hewipke duç keliwatqanliqini, şunga informatsiyon merkizi terkiwidiki hadimlarning jiddi seperwerlikke kelip, Hitay hakimiyitining Uygurlarni omomiy yüzlük atsimilatsiye qilip yoqutuş stiratigiyisige qarşi çetellerde küçlük inkas yaritiş kereklikini bayan qildi.
Yiğin ahirida, Shiwitsiyedin buqetimqi yiğinğa qatnişiş üçün kelgen informatsiyon merkizining muawin reyisi we qoşumçe bayanatçisi Dilşat reşit buyil kirgendin buyanqi élip barğan hizmetliri we buningdin kéyin ijra qilidiğan yengi taktikiliri heqqide merkezge tepsili doklat berdi.