Dunya Uygur Ahbarat Tori 2001

Öz hewirimiz: buyil 3 – ayning 10 – küni Awustiriyening paytehti Viyena shehride Tibet qozghilingining 42 – yilliqini hatirilesh munasiwiti bilen Hitaygha qarshi keng – kölemde birleshme namayish ötküzüldi. Bu qétimqi namayishqa, Yawropada yashawatqan Tibetlikler we ularning chetellik qollighuchiliri, Sherqiy Türkistanliqlar, Ichki Monggholistanliqlardin bolup jem’i ikki mingdin artuq kishi qatnashti.
Sherqiy Türkistanliqlargha wakaliten < Birleshken Döletler Teshkilatida Wekili Bolmighan Milletler Teshkilati > ning bash katibi Erkin Alptekin, < Sherqiy Türkistan ( Uyguristan ) milliy qurultiyi > ning bash katibi Esqerjan, < Dunya Uygur Yashliri Qurultiyi > ning reyisi Dolqun Eysa bashchiliqidiki bir gurup Uygur ayrim – ayrim halda Gollandiye we Germaniyelerdin kelip bu qétimqi birleshme namayishqa ishtirak qildi.
Namayishchilar shu küni saet 12 de Viyena shehrining asasliq merkizi hisaplanghan merkzi meydanigha toplanghan bolup, Tibet, Sherqiy Türkistan, Ichki Monggholistanlarning bayriqi we Hitaygha qarshi türlük lozunka hem teshwiqat tahtiliri bilen bizelgen meydan intayin heywetlik tüs alghan idi.
Namayishchilar qoshuni omomi yürüsh bashlashtin burun, Tibet, Sherqiy Türkistan we Ichki Monggholistanliqlarning wekilliri sehnige chiqip söz qilip, kommunist Hitay hakimiyitining öz mustemlikisi astidiki Tibet, Uygur we mongghol heliqlirige séliwatqan türlük zulumlirini we qirghinchiliq siyasitini pash qildi.
Sherqiy Türkistanliqlargha wakaliten Erkin Alptekin söz qilip, Sherqiy Türkistanning nöwettiki échinishliq weziyiti heqqide qisqiche izahat berish bilen birge, kommunist Hitay hakimiyitining Uygur helqini tamamen atsimilatsiye qilip yoqutush üchün pütün küchi bilen tirishiwatqanliqini bayan qildi hemde az sanliq millet rayonliri ichide Sherqiy Türkistanning weziyitining pewquladde éghir ikenlikini alahide eskertip ötti. Erkin Alptekinning engiliz tilida qilghan nutqi namayishchilar qoshunining qizghin alqishigha erishti.
Nutuq sözlesh ahirlashqandin keyin, namayishchilar heywetlik sep tüzüp, merkizi meydanidin yolgha chiqip, Viyenaning asasliq kochilirini aylinip chiqti. Namayishchilar Hitay konsulhanisining aldidin ötkende kommunist Hitay hakimiyitige qarshi jarangliq shoar towlap, pütün etrapni zil – zilige saldi. 
Bu qétimqi namayish saet 12 de bashlinip, 16 tide ahirlashti. Buqétimqi namayish Awustiriyening asasliq radiyo – teliwiziye we gezitliride, shundaqla Yawropadiki köpligen metbuatlarda keng kölemde hewer qilindi.