"Sherqiy Türkistan Informatsiyon Merkizi" teripidin qolgha çüshürülgen Hitayçe "Hoten geziti"ning bu yil 11 – ayning 2 – künidiki sanida élan qilinghan bir hewerning mezmonigha asaslanghanda, Hitay hökümiti Hotenning Çeriye nahiyiside hökümet hadimliridin terkip tapqan 4 tekshürüsh guruppisi uyushturup, "muqimliq" heqqide mehsus yerlik helqning rayini sinash herikiti élip barghan.

Mezkur gezitning hewiride bayan qilinishiçe, yuqurqi tekshürüsh guruppiliri asasi qatlamlargha bérip, yéza – bölüm derijilik kadirlar, bashlanghuç – ottura mektep oqughuçiliri, dini zatlar, taliplar arisida tekshürüsh élip bérip, ulardin töwendikidek 4 hil soalni sorighan:

1. Köresh yoqutuldi, siz buninggha qandaq qaraysiz?
2. Dingha qarita ünümlük bashqurush yolgha qoyulghandin kéyin, mesjitlerdiki diniy paaliyetlerge qarita "6 ge yol qoymasliq", "3 ni çeklesh" tedbirliri tüzüp çiqildi, diniy sahediki zatlarning buninggha bolghan pozitsiyesi qandaq?
3. Yéqinqi yillardin buyan eksiyetçil guruhlargha qatnashqanlarning köpinçisi yash – ösmürler, beziliri bolsa oqughuçi, bu némidin derek béridu?
4. Islahat, éçiwetishtin ibaret yahshi siyasetke tayinip soda qilip bay bolghan yekke tijaretçilerning nöwettiki düshmenge qarshi Köreshke bolghan meydani we pozitsiyesi qandaq? Ularning içide qandaq mesililer sadir boliwatidu?

"Hoten geziti"ning hewiride bu qétimqi tekshürüshning netijisi heqqide éniq melumat bérilmey, peqetla, "tekshürüsh arqiliq, buningdin kéyin Çeriye nahiyiside muqimliq hizmitini ilgiri sürüshke paydiliq bolghan bezi konkret mesililer we pikirler igellendi" déyilgen.

Yuqurqi hewerde kishining diqqet – étibarini qozghaydighan asasliq mesile shuki, uningda, nöwette kommunist Hitay hakimiyitige qarshi heriket élip bériwatqanlarning asasliq qismining yashlardin, hetta ottura mektep oqughuçiliridin terkip tapqanliqi bayan qilinghan, bu, Hitay hakimiyitining Sherqiy Türkistanda "sotsiyalizimning kelgüsi izbasarlirini terbiyilesh" üçün élip bériwatqan tirishçanliqlirining taza put tirep turalmighanliqini körsitidu.

Undin bashqa yene, Sherqiy Türkistandin Germaniyege kélip siyasiy panahliq tilep turiwatqan bezi Uygurlarning bayan qilishiçe Sherqiy Türkistanda herbir siyasiy weqe yüzbergende, Hitay dairliri mehsus mehpi saqçilardin terkip tapqan tekshürüsh guruppilirini uyushturup, "pikir alimiz" dégen nam bilen yerlik helqtin gep koçilaydighan boliwalghan, bu jeryanida uqushmay hökümetke bolghan bezi étirazlirini bildürgen kishiler derhal qolgha élinghan.