" Sherqiy Türkistan Informatsiyon Merkizi" terpidin qolgha çüshürülge Hitayçe "Hoten Geziti"ning bu yil 9 – ayning 14 - künidiki sanida elan qilinghan bir hewerning mezmunigha asaslanghanda, Hitay hökümiti çeteldin kirgen kitap – jornal we neshriyat buyumlirini, Sherqiy Türkistanda kommunist Hitay hakimiyitige qarshi türlik shekildiki milliy musteqilliq herketlirining ulghuyup ketishige sewepçi boluwatqan eng asasliq amillarning béri, dep qarighan.

Mezkur gezitning hewirige qarighanda, bu yil 9 – 12 – küni "Hoten wilayetlik muqimliqni saqlash hizmet guruppisi" , Hoten rayonida kishilerning qolida tarqilip yürgen Hitaygha qarshi mezmundiki neshriyat buyumliri we ünalghu – sinalghularning lintilirini yighiwélish heqqide alahide uhturush tarqatqan.

Uhturushning bash qismida eynen mundaq diyilgen: "yéqinqi mezgillerdin buyan wilayitimizde eksiyetçi, qanunsiz neshriyat buyumliri we ünalghu – sinalghu lentilirining jemyetke tarqilish miqdari intayin keng bolmaqta, bu keng ammining bulupmu yash - ösmürlerning köplep jinayet ötküzüshige qanunsiz diniy herketlerning, milliy bölgünçilikning we zorawan teroristik herketlirining ewjélip ketishige biwasta sewepçi bolmaqta, shundaqla bu wilayitimizning muqumliqigha éghir hewıp yetküzidighan asasliq amillarning birige aylandi. Shunga hazirdin bashlaap pütün wilayitimizde yéqin mezgil içide eksiyetçil, qanunsiz neshriyat buyumlirini we ünalghu – sinalghu lentilirini yighiwélish mehsus körishini bashliduq”.

Uhturushta yene, " Belgilengen muddet içide munasiwetlik tarmaqlargha eksiyetçil, qanunsiz neshriyat buyumlirini tapshurmighanlarni qolgha élip, qanun boyiçe qattiq jazalaymiz" dep tehdid qilinghan.

Kommunist Hitay hakimiyitining Sherqiy Türkistanda yerlik helqning neshriyat, metbuat erkinlikige qattiq çeklime qoyup, ularning tashqiy dunya bilen bolghan alaqisini tamamen üzüp tashlashqa urunup kiliwatqanliqi, pütün dunya jamaetçiliki terpidin bilinip kelmekte. Hotendiki hökümet dairlirining "Muqimliqni qoghdaymiz" digen bahane bilen yuqarqi uhturushni tarqitishtiki asasi meqsidimu, Sherqiy Türkistan helqining hur we erkin dunyani çüshinishining aldini élish, kommunistik ang we idilogiyeni yerlik helqning mingisige zorlap singdürüshtin ibaret!