Öz muhbirimiz Ömerjan Imin heber qilidu: Merkizi orgini Germaniyening Miyunhin shehride bolghan "Sherqiy Türkistan (Uyguristan) Milli Qurultiyi " bilen "Dunya Uygur Yashliri Qurultiyi "ning rehberliri Germaniyedin bir qisim Uygurlarni Fransiyege bashlap berip, bu yil 10-ayning 22-künidin 24-künigiçe, Fransiye`ning Liyon, Paris qatarliq sheherliride Hitayning dölet reisi Jang Zemin`ning Fransiye`ge ziyaretke kelgenligi munasiwiti bilen ötküzülgen naraziliq namayishlirigha qatnashti.

Aldi bilen 10-ayning 22-küni "Dunya Uygur Yashliri Qurultiyi"ning bir gurup ezaliri, Yashlar qurultiyi ijraiye komititining reisi Dolqun Eysa`ning yetekçiligide Germaniye`ning Miyunhin shehridin Fransiye`ning üçünji çong shehri Liyon`gha yetip bérip, Tibet, Içki Mongghulistan we demokratik Hitay teshkilatliri bilen birlikte Liyondiki "metbuat sariyi"ning aldida Hitaygha qarshi çong kölemlik birleshme namayish ötküzdi.Bu qétimqi namayishqa yuqarqi teshkilatlar we ularning Fransiyediki yerlik helqtin teshkil tapqanqollighuçilardin bolup jemi 2 minggha yeqin kishi qatnashti. namayishçilarning Hitay diktaturisi Jang Zemingha qarshi towlighan shuarliri "metbuat sariyi"ning aldini zil-zilige salghan idi. adem dengizigha aylanghan meydan içide özining ay-yultuzluq bayriqi we körkem milliy kiyimliri bilen çetel muhbirlirining diqqet-etiwarigha sazawer bolghan Uygur namayishçiliri, mustebit Hitay hakimiyitige qarshi shuarlar yezilghan her hil lozunka we tahtilarni igiz kötürüp,Hitaygha qarshi teshwiqat waraqlirini tarqitip we jenggiwar shuarlarni towlap, Uygurlarning kommunst Hitay hakimiyitige bolghan çeksiz öçmenlikini toluq ipadilidi.

Undin bashqa yene alahide tilgha élishqa erziydighini shuki, "Sherqiy Türkistan (Uyguristan) Milliy Qurultiyi" siyasi meslihet kengishining reisi we 30 yilliq hayatini Hitayning qarangghu zindanlirida ötzüzgen ataghliq jamaet erbabimiz hem meshhur tarihçimiz Haji Yakup Anat ependimu namayishning tunji künidin etibaren yashlar qurultiyi teripidin teshkillengen namayishçilar sepida yer alghan idi.Namayish jeryanida Haji Yaqup ependi Uygurlargha wakaliten birqançe qétim alahide nutuq sözlep, Sherqiy Türkistan, Tibet, Içki Mongghulistan we demoktatik Hitay teshkilatlirining ezaliridin terkip tapqan namayishçilargha we namayishlarni küzetken yerlik helqqe, nöwette Sherqiy Türkistan helqining insani heq-hoquqlirining kommunist Hitay hakimiyiti teripidin qattiq ayaq-asti qiliniwatqanliqiniemili misallar bilen janliq we tesirlik shekilde bayan qilip, namayishqa qatnashquçilarning we çetelliklerning Uygur helqige bolghan alahide hisdashliqini qozghidi.

10-ayning 23-küni "Dunya Uygur Yashliri Qurultiyi"ning ezaliridin teskil tapqan namayishçilirimiz, Hitay reisi Jang Zeminning Fransiye dölet reisi Shirakning tughulghan yurti Brevediki öyige teklip qilinghanliqini anglap, arqisidin qoghlap Brevege yetip berip Shirakning sariyining etrapini çöridep orunlushup, bu yerdimu bir namayish sepi hasil qilip, Hitaygha qarshi ünlük halda shuar towlap we teshwiqat waraqlirini tarqitip, Uygur dawasini Breve helqige anglatti. namayishçilarning heywitidin qorqqan Jang Zemin we uning hemraliri saraydin çiqishqa juret qilalmidi.

10-ayning 24-küni, bu qétimqi marafunçe namayishning 3-küni "Dunya Uygur Yashlar Qurultiyi" wekilliri Fransiyening paytekti Parijgha yetip kélip, Parijning pütün dunyagha meshhur Bastilliye meydanida Jang Zemingha qarshi namayish qilish üçün yighilghan birqançe yüz kishilik namayishçilar sepige qoshulup, bu yerdimu çong kölemlik namayish ötküzdi.

10-ayning 24-küni ,"Sherqiy Türkistan(Uyguristan) Milliy Qurultiyi"ning bash katiwi "Yawropa Sherqiy Türkistan Birliki"ning reisi Esqerjanmu, helqera keçürüm teshkilati Fransiye shöbisi we Fransiediki Tibet teshkilatlirining tekliwige asasen, shu küni Parijda ötküzülidighan Jang Zemingha qarshi namayishqa qatnishish üçün bir gurup Uygurni bashlap Germaniyedin alahide Parij shehrige kélip, bu yerdiki namayishçilirimizning sepige qoshuldi.Uygur namayishçilar Bastilliye meydanida ötküzülgen heywetlik namayish jeryanida Uygurlarning insan heqlirining depsende qiliniwatqanliqi toghrisida keng-kölemde teshwiqat élip berip, çetel muhbiri we ammining Uygurlargha bolghan qiziqishini we hisdashliqini qolgha keltürdi.

Shu küni, milliy qurultiyimizning bash katiwi Esqerjan namayishqa qatnishishtin burun aldi bilen "Helqara keçürüm teshkilati Fransiye shöbisi"ning Parijdiki ishhanisini ziyaret qilip, bu yerde "Helqara keçürüm teshkilati Fransiye shöbisi"ning asasliq mesullirigha Sherqiy Türkistanning nöwettiki siyasi weziyiti heqqide tepsili melumat berdi.Körüshüsh jeryanida Fransiyediki helqara keçürüm teshkilatining mesullirimu buningdin keyin Uygurlar bilen bolghan hemkarliqni yenimu küçeytidighanliqini we özliri bashquriwatqan türlük metbuat wastiliri arqiliq Sherqiy Türkistan mesilisini Fransuz helqige aktip shekilde teshwiq qilidighanliqini bildurushti.