Öz muhbirimiz hewiri: bu yil 10 – ayning 1 – küni chüshtin keyin Berlin shehride ötkülüzidighan Hitaygha qarshi naraziliq namayishigha qatnishish üchün Munchen shehridin bir aptobus bilen yolgha chiqqan bir qisim uygur jamaiti, shu küni chüshtin burun Berlingha 20 nechche kilometir yiraqliqtiki Postdam shehrige berip, merkizi orgini bu sheherge jaylashqan "Yawrupa mosulman adwukatlar jamiyiti"ni we bu jemiyet qarmiqidiki germanche "Islam geziti" idare heyitini ziyeret qildi. Bu qetimqi ziyeret jeriyanida, "Sherqiy Türkistan Informatsion Merkizi"ning prezidenti Abdujelil Qaraqash riyesetchilikidiki uygur jamaiti Postdamdiki Ababekri Regir ependi reislikidiki "Yawrupa mosulman adwukatlar jamiyiti" we "Islam geziti" idare heyitning barliq ezaliri bilen mahsus söhbet yighini ötküzdi. Söhbet yighinida Abdujelil Qaraqash ependi aldi bilen köpchilikke Sherqiy Türkistanning yeqinqi siyasi weziyiti heqqide etirapliq melumat berdi. Arqidin "Yawrupa mosulman adwukatlar jamiyiti" bilen "German – uygur jamiyiti"ning reisi Ababekri Regir ependi söz qilip, Sherqiy Türkistanliq mosulman qerindashlirining kommunist Hitayning zulmidin qurtulush üchün elip beriwatqan küreshlirige yerdem berishke her zaman teyer ikenlikini bayan qilip ötkendin keyin, mundaq didi: " Biz buningdin keyin Sherqiy Türkistanliq qerindashlirimizning tartiwatqan zulumlirni dunyagha jamaetchilikige anglitishqa pütün küchimiz bilen tirishimiz. Yeni biz Sherqiy Türkistanning siyasi wezitini yeqindin közitip, duniya internet tori we jemiyitimiz teripidin neshir qiliniwatqan "Islam geziti" arqiliq Sherqiy Türkistandiki Hitayning zulumini dunya jamaetchilikige waqtida tuyghuzushqa tirishimiz". Bu yil kirgendin buyan biz "Islam geziti"ning her sanida digudek uygurlar heqqide azdur – köptür melumat berip keliwatimiz. Hazir bizning adwukatlar jamiyitimiz qarmiqida bir institot bar, eger bu institotta til ügünidighan uygur oqughuchilar bolsa biz derhal qobul qilip heqsiz oqutimiz, bu jehette bizning shert – sharaitimiz hazir. Eger biz turivatqan bu Postdam shehrige kelip orunlishini halaydighan uygurlar bolsa, biz ular bilen inaq jamaet bolup ötümiz we ularni ish tepish, oqush we adwukatliq jehettin qolimizdin kelishche yerdem qilimiz".

Sohbet ahirida Abdujelil Qaraqash pütün Sherqiy Türkistanliqlar namidin Ababekr Regir ependige minnetdarliq bildürdi. Sohbettin keyin Postdamdiki "Yawrupa mosulman adwukatlar jamiyiti"ning barliq ezalliri Munchendin kelgen uygurlargha qoshulup, shu küni chüshtin keyin Berlinde ötküzülidighan Hitaygha qarshi namayishqa qatnishish üchün Berlin shehrige qarap yolgha chiqti.

Köpchilikke melum bolsa kerek, bu yil 4 – ayda merkizi aparati Germaniyaning Munchen shehridiki "Sherqiy Türkistan Informatsion Merkizi" bilen Postdamdiki "Yawrupa mosulman adwukatlar jamiyiti" birliship "German – Uygur dostliq jamiyiti"ni qurup chiqqan bolup, Ababekri Regir ependi bu jamiyetning reislikini, Abdujelil Qaraqash ependi muavin reislikini öz üstige alghan idi. Shuningdin etiwaren bu ikki teshkilat öz ara zich hemkarliq munasiwiti ornutup kelmekte. Merkizi Postdam sheherdiki "Yawrupa mosulman adwukatlar jamiyiti" – Germaniye, Ispaniye, Angiliye, Shotlandiye qatarliq döletlerdiki hiristiyanliqni tashlap mosulman bolghan gheriplik adwukatlardin terkip tapqan bolup, bu teshkilat teripidin neshir qilivatqan "Islam geziti", pütün Yawrupa boyiche German tilide neshir qiliniwatqan birdin – bir gezittin ibaret.