Öz mühbirimiz hewiri: bu yil 10 - ayning 15 - küni chüshtin keyin, Kommunist Hitay armiyisining Sherqiy Türkistanni ishghal qilghanliqinning 50 - yilliqi munasiwiti bilen Germaniyening München shehridiki Hitay konsulhanisi aldida daghdughuluq halda naraziliq namayishi ötküzüldi. Bu qetimqi namyishqa, München shehride chaqirilghan 2 - nöwetlik Sherqiy Türkistan Milliy Qurultiyigha qatnishish üchün dunyadiki 10 dölettin kelgen 16 Sherqiy Türkistan teshkilatining wekilliri, bir qisim meshhur jamaet erbaplirimiz we Germaniyening München shehrida yashawatqan Türkistanliqlardin bolup 300 ge yeqin Uygur qatnashti. Shu küni chüshtin keyin Germaniye waqti saet 2 etrapida Sherqiy Türkistanliq namayishchilar aldi bilen Hitay konsulhanisigha tehminen 2 km yiraqliqtiki Shabinplantz meydanigha toplandi, arqidin ular ay-yultuzluq kök bayriqimizni we Hitaygha qarshi shoarlar yezilghan lozunkilirimizni igiz kötürüp, retlik halda sep sep tüzüp mangghan meshhur Roman Shtrasi kochisidiki qatnashlar pütünley qamal qilindi. Namayishchilirimizning aldinqi sepide 10 din artuq yigitimiz bu qetimqi namayish uchun Türkiyedin alahide elip kelingen kengliki 4 metir, uzunliqi 6 metir kelidighan chong ay – yultuzluq kök bayriqimizni qol – qolche egiz kötürüp, dembes qedemler bilen heiwetlik halda yol echip mangdi. Namayishchilirimiz yol boyi Hitaygha qarshi jarangliq halda shoar towlap, etirapta namayishimizni küzitiwatqan chet’ellik ammining alahide diqqet – etiwarini qozghidi. Namayishchilar qoshunimiz heywet bilen Hitay konsulghanisining aldigha yetip kelgende bolsa, konsulhanining aldidiki kichik meydan tertip qoghdighuchi saqchilar bilen tolup ketken idi. Namayishchilirimiz Hitay konsulhanisining aldida retlik tezilip, konsulhanigha qarap jarangliq halda shoar towlap, etirapni zil – zilige saldi. Namayishchilirimiz Germanche, Hitayche, Engilische, Rosche we Uygurche tillarda hech üzüldürmey, "Hitaylar Sherqiy Türkistandin chiqip ketsun!", "Weten bizning!", "Shehitler ölmes!", "Shehitlirimizning qisasini choqum alimiz!", "Sherqiy Türkistangha musteqilliq!", "Yashisun Erkinlik! Yashisun demokratiye! Yashisun insan heqliri!", "Sherqiy Türkistandiki qirghinchiliq tohtutulsun!", "Pilanliq tughut tohtutulsun!", "Atom sinaqliri tohtutulsun!" ... digen shoarlarni janliq, jarangliq we hissiyatliq halda towlap, özlirining Hitay mustemlikichilirige bolghan ghezep – nepritini toluq namayen qilishti. Namayish jeriyanida, "Sherqiy Türkistan Milliz Qurultiyi"ning yengidin saylanghan Bash Katiwi we "Yawrupa Sherqiy Türkistan Birliki"ning reisi Eskerjan Sherqiy Türkistanliqlargha wakaliten Germanche, nutuq sözlep, 50 yildin buyan Kommunist Hitay hakimiyitining Sherqiy Turkistan helqighe pütmes – tügimes balayi – apetlerni elip kelgenlikini, nöwette Sherqiy Türkistan helqining insani heq – hoqoqlirining tarihta hech bir millet duch kelip baqmighan derijide eghir halda depsende qiliniwatqanliqini, sansizlighan bigunah Uygurlarning Hitay dairiliri teripidin ölüm jazalirigha höküm qilinip etip öltürüwatqanliqini, naheq halda türmilerge tashliniwatqanliqini, tepsili bayan qilip ötkendin keyin, gherip bashchiliqidiki pütün dunya jamaetchlikini Kommunist Hitay hakimiyitining Sherqiy Türkistan helqighe qarita yürgüziwatqan insan qelipidin chiqqan wehshi zulum siyasetlirini eyipleshke we Sherqiy Türkistan helqining öz teqdirini özi belgilesh we insanche yashash hoquqini qolgha kelturush uchun elip beriwatqan heqqani küreshlirini qollap – quwetleshke hem uninggha hesdashliq qilishqa chaqiridi.