Öz hewrimiz: Bashshitabi Londondiki Helqara Keçürüm teshkilati bu yil 8- ayning 3- we 12- künliri Hemit Muhemmet, Qasim Mehpir, Ilyas Zordun, Zulpiqan Muhemmet we Seydehmet Muhemmet qatarliq 5 neper Uygur yash heqqide mehsus murajetname çiqirip, bu murajetnamilarni ayrim- ayrim halda pütün dunyadiki barliq helqaraliq teshkilatlargha, insan heqliri teshkilatlirigha we herqaysi ellerning milliy parlamentlirige yollidi. Helqara keçürüm teshkilaening bu ikki murajetnamisining bash qismida, bu yilning bashlirida Qazaqstan hökimiti teripidin Hitay hökimitige qayturup berilgen Hemit Muhemmet, Qasim Mehpir, Iliyas Zordun qatarliq Uygur yashlirining aqiwitining tehi hazirgha qeder namelum ikenliki, Hitay hökümitining qayturup berilgen bu yashlarni qaysi türmige qamighanliqini yoshurup kelgenliki, uning üstige Hitay hökimitining "Milli bölginçilerge yardem qildi" digen böhtan bilen, Hemit Muhemmetning iniliridin Zulpiqar Muhemmet bilen Seydehmet Muhemmetlerni qolgha élip, ularni Ghja sheherdiki "Yengi Hayat Türmisi"ge qamighanliqi, bu ikki neper bigunah yashning türmida insan qélipidin çiqqan wehshi usollar bilen qattiq qiyin- qistaqqa élinghanliqi, hetta tirnaqlirining yulup éliwetilgenliki, netijide Zulpiqar Muhemmetning 1999- yili 7- ayning 25- küni Ghuljidiki "Yéza Igilik 4- Dewiziyesi Ottura Sot Mehkimisi" teripidin ölüm jazasigha höküm qilinghanliqi, Seydehmet Muhemmetning 6 yilliq qamaq jazasigha höküm qilinghanliqi tepsili bayan qilindi. Murajetnamining ahirida Hitayning dölet reisi Jiang Ze Ming, bash ministiri Zhu Rong Ji, Hitay ali teptish mehkimisining bash teptishi Han Zhu Bin, "Shin Jiang Uyghur Aptonom Rayoni" ning reisi Ablet Abdurishit, "Shin Jiang Uyghur Aptonom Rayonluq Ali Sot Mehkimisi" ning bashliqi Abdurehim Qadir qatarliqlarning adresi, fax we telefun nomurliri tepsili yer alghan bolup, Helq ara keçürüm teshkilati dunyadiki helqaraliq teshkilatlardin, insan heqliri teshkilatliridin, milli parlamentlardin we barliq ammiwi teshkilatlardin yuqarqi shehsilerge naraziliq mektubi yollap, Hitay hökimitining Uygurlargha qratqan insan heqliri tajawuzçiliq qilmishlirini qattiq eyipleshke çaqirdi.
Köpçilikke melum bolsa kérek, helqara keçürüm teshkilati buyil 2- ayning 15- küni Qazaqstan hökümitining Hemit Muhemmet, Qasim Mehpir, Iliyas Zordun qatarliq yashlarni Hitay hökimitige qayturup bergenlik qilmishini eyiplep tünji qétim murajetname tarqatqan idi.